ငါ၊ သူတပါး၊ အရိုင်းစိတ်နှင့် ဒါဝင်ဝါဒ

ငါ၊ သူတပါး၊ အရိုင်းစိတ်နှင့် ဒါဝင်ဝါဒ

(၁)

`တစ္ဆေ’အမည်ရှိ သင်္ဘောသည် ဆန်ဖရန်စစ္စကိုမြို့၏ ကမ်းလွန်ပင်လယ်ပြင်တွင် ရွက်လွှင့်၍နေသည်။ လေသည် ပြင်းပြင်းထန်ထန် တိုက်ခတ်၍နေ၏။ သင်္ဘောပဲ့ပိုင်းသည် တိမ်းစောင်း၍သွားသည်။ ရေများ ပဲ့ပိုင်းလက်ရန်းကို ကျော်ဖြတ်ပြီး ကုန်းပတ်ပေါ်အထိ ဝင်လာသည်။ `အလောင်းကောင်’ ပေါ်သို့ ရေများ ဖြတ်သွား၏။

`အသုဘအခမ်းအနား လုပ်ထုံးလုပ်စဉ်နဲ့ပတ်သက်ပြီး ငါတပိုင်းတစပဲ မှတ်မိတယ်။ ဒါကတော့ ရုပ်အလောင်းကို ပင်လယ်ထဲ ပစ်ချရမယ်ဆိုတဲ့ အပိုင်းပဲ၊ ဒါကြောင့် ပင်လယ်ထဲပစ်ချလိုက်တော့’

အလောင်းကောင်၏ ထိပ်မှရပ်၍ `တစ္ဆေ’ သင်္ဘောကပ္ပတိန် လာဆင်သည် ထိုသို့ပြောရင်း ဈာပန အခမ်းအနားအား ကျင်းပနေ၏။ စကားက ဤမျှနှင့်ရပ်သွား၍ အလောင်းထည့်ထားသော အိတ်ကို ကိုင်ထားသူများ အူကြောင်ကြောင် ဖြစ်နေကြသည်။

`ဟေ့ကောင်တွေ ဘာဖြစ်နေတာလဲ၊ ပစ်ချလိုက်ဆိုတာ မကြားဘူးလား’ ထိုသို့ ပင်လယ်ဝံပုလွေ (SeaWolf) အား ဂျက်လန်ဒန်သည် ပင်လယ်ပြင်သင်္ဘောပေါ်မှ ဈာပနအခမ်းအနား မြင်ကွင်းနှင့် ဖွင့်၏။

( ၂ )

စာအုပ်အမည်                               ပင်လယ်ဝံပုလွေ
စာရေးသူအမည်                           Jack London
ဘာသာပြန်သူအမည်                     ညွန့်ကြူး
ပုံနှိပ်မှတ်တမ်း                              ပထမအကြိမ် ၁၉၇၅
ဒုတိယအကြိမ်                              ၁၉၉၂
တတိယအကြိမ်                            ၂ဝဝဝ
ထုတ်ဝေသူ                                  လှကြိုင်၊ ဝ၂၃၃ လောကစာပေ၊
စာမူခွင့်ပြုချက်အမှတ်                     ၁ဝ၃၆/၉၉ (၁၂)
အုပ်ရေ                                       ၁ဝဝဝ
တန်ဖိုး                                        ၃ဝဝ ကျပ်

`ဂျက်’ အား ၁၈၇၆ ခုနှစ် ဇန်နဝါရီလ ၁၂ ရက်နေ့တွင် ကယ်လီးဖိုးနီးယားပြည်နယ်၊ ဆန်ဖရန်စစ္စကိုမြို့၌ မွေးဖွားခဲ့၏။ မိခင်က `ဖလော်ရာဝဲ(လ်)မင်း’ ဖြစ်သည်။ `ဖလော်ရာ’က စန္ဒရားဆရာမတဦးအဖြစ်နှင့် ဆန်ဖရန်စစ္စကိုမြို့တွင် တဦးတည်းနေ၏။ အိမ်းငှားနေထိုင်ရင်း အခန်းချင်းနီးကပ်သည့် အခန်းဖော် ပါမောက္ခချင်းနီနှင့် အနေနီးစပ်ကြ၏။ `ဖလော်ရာနှင့် ပါမောက္ခချင်းနီ’ တို့ ရောရောနှောနှော၊ ရင်းရင်းနှီးနှီး ဆက်ဆံနေထိုင်ရင်း ဂျက်အား သန္ဓေတည်ခဲ့ကြသည်။ ဖလော်ရာသည် ပေါ့ပေါ့ပါးပါး မဟုတ်တော့၊ ကိုယ်လေးလက်ဝန် ရှိလာလေပြီ။ ဤအရေးအတွက် ဖလော်ရာအတွက်ရှင်းရန် ထွေထွေထူးထူးမရှိ၊ ဤကိုယ်ဝန်မှာ ပါမောက္ခချင်းနီနှင့်ရခဲ့သည့် ကိုယ်ဝန်သာဖြစ်၍ ပါမောက္ခချင်းနီနှင့်တွေ့ပြီး ရှင်းပြ၍ သူတို့ တရားဝင်လက်ထပ်ကြရန်သာ။ ဤသို့ပင် ဖလော်ရာ ထင်ထားခဲ့၏။

သို့သော် ဖလော်ရာ ထင်ထားသကဲ့သို့ `ချင်းနီ’ နှင့် တွေ့ကြရာတွင် ဖြစ်မလာခဲ့။ `ချင်းနီ’ က သူနှင့်ရသော ကိုယ်ဝန်မဟုတ်ဟု ခါးခါးသီးသီးငြင်း၏၊ လက်မထပ်နိုင်။ အဖေအဖြစ် အဖော်မခံနိုင်ဟု ခေါင်းခါခါ၊ လည်ခါခါငြင်း၏။ အဆုံး၌ ဖလော်ရာသည် သူ့ကိုယ်သူ ပစ္စတိုသေနတ်နှင့်ပစ်၍ သေကြောင်းကြံခဲ့၏။ ကံကောင်း၍ သေလောက်သည့်ဒဏ်ရာ မရခဲ့။ ဤသို့နှင့် `ဂျက်’သည် လူဖြစ်လာခဲ့ရခြင်း ဖြစ်၏။ ထိုသတင်းသည် ထိုစဉ်က ဆန်ဖရန်စစ္စကိုမြို့ထုတ် `ခရောနီကယ်’ သတင်းစာကြီး၌ မျက်နှာဖုံးသတင်းတပုဒ် ဖြစ်ခဲ့ရ၏။

`ဖလော်ရာ’သည် `ဂျက်’ ကို မွေးဖွားခဲ့ပြီး မွေးစာရင်းတွင် သူမကိုယ်သူမ မစ္စစ်ဖလော်ရာချင်းနီနှင့် သူမ၏ သားငယ်အား `ဂျက်ချင်းနီ’ ဟူ၍ စာရင်းသွင်းခဲ့၏။ `ဂျက်’ ၈ လသားအရွယ်တွင် `ဖလော်ရာ’ သည် `ဂျွန်လန်ဒန်’ ဆိုသူနှင့် တရားဝင် အိမ်ထောင်ပြုလိုက်၏။ ဤတွင် မစ္စစ်ဖလော်ရာချင်းနီသည် မစ္စစ်ဖလော်ရာလန်ဒန်ဖြစ်ပြီး၊ `ဂျက်ချင်းနီ’ သည်လည်း `ဂျက်လန်ဒန်’ ဟူ၍ ဖြစ်ခဲ့ရတော့၏။  `ဂျက်လန်ဒန်’ လူဖြစ်ကြီးပြင်းခဲ့ရသည့် အချိန်ကာလက အမေရိကန်လက်ဝါးကြီးအုပ် အရင်းရှင်စနစ်အတွင်း လူနေမှုစနစ်များ ဖောက်လွဲဖောက်ပြန်နှင့် ဝရုန်းသုန်းကား ဖြစ်ပွားနေသောကာလ။

`ဘဏ္ဍာအရင်း’ နှင့် `လုပ်အား’ တို့၏ ပဋိပက္ခသည် အထွတ်အထိပ်သို့ တတ်နေသည့်အချိန် ဆင်ဒီကိတ်၊ ထရပ်(စ်)၊ ကာတဲ(လ်)တို့က အမြတ်ရရေးတခုတည်းအပေါ် ကြည့်ပြီး အရာရာကို လည်မျိုညှစ်ဝါးမျိုနေသည့်ခေတ်။ သို့ဤသော လူမှုဒုက္ခဝဲဂယက်ကြီးအတွင်း ဂျက်လန်ဒန်တို့ မိသားစုသည်လည်း မြုပ်ချီပေါ်ချီနှင့် စီးမျော၍နေခဲ့ကြရမည်။

(၃)

ဥက္ကလန်ဆိမ်ကမ်း၊ ဥက္ကလန်ဆိမ်ကမ်းက `ဂျက်’ ကျောင်းသားဘဝ အထီးကျန် ဝံပုလွေငယ်တကောင်အဖြစ်နှင့် ရှိစဉ်ကပင် ရောက်ခဲ့ကျင်လည်ခဲ့ဖူးသည့် နေရာ။ ဂျက်အတွက် မစိမ်း။ ဥက္ကလန်ဆိပ်ကမ်းက လူပေါင်းစုံ၏ ဝေလငါးဖမ်းသည့် ရေမုဆိုးကြီးများ ပင်လယ်ဓားပြများ၊ ဘိန်းကုန်သည်များ၊ ပင်လယ်ကူးသင်္ဘောသားများ၊ တံငါးသည်များ၊ ငါးသူခိုးများ ပြည်တန်ဆာများ ရှုပ်သည်၊ ပွေသည်၊ ရက်စက်သည်၊ ကောက်ကျစ်သည်၊ ဥပဒေအပြင်မှ စီးပွားရှာစားကြသည့် သူတို့ ကျက်စားရာ စားကျက်၊ တောနက်ကြီး၏ သားရဲတွင်း။

ဤစားကျက် သားရဲတွင်းသို့ ဂျက်သည် ၁ဝ နှစ်သား အရွယ်ကတည်းက ရောက်ခဲ့ ခိုသီခဲ့ဖူး၏။ ဥက္ကလန်ဆိပ်ကမ်းတွင် `ဂျက်’ အတွက် အလုပ်က အဆင်သင့်၊ အလုပ်က ဆန်ဖရန်စစ္စကို ကမ်းလွန်ပင်လယ်အတွင်း `ကမာ’ ခိုးဖမ်းသည့် အလုပ်။

ဤသို့နှင့် ဂျက်သည် ဥက္ကလန်ကမ်းခြေနှင့် ဆန်ဖရန်စစ္စကို ကမ်းလွန်ပင်လယ်ပြင်တွင် ကျင်လည်ရင်း ပင်လယ်ဝံပုလွေတကောင် ဖြစ်လာခဲ့တော့၏။ ပင်လယ်ပြင်လှိုင်းလေအကြား ရွက်လွှင့်ရင်း စီးချင်းထိုးလား ထိုး၏။ ကမ်းခြေစောင့်ရဲနှင့်ပေါင်း၍ ဓားပြဂိုဏ်များအား ဖမ်းလား ဖမ်းခဲ့၏။ နောက် `ဆူသာလင်’ အမည်ရှိ ငါးဖမ်းသဘောင်္တွင် သဘောင်္သားအဖြစ်နှင့် တောင်တရုတ်ပင်လယ်ပြင်သို့ ထွက်ခဲ့ပြန်လေ၏။ ပစိဖိတ်သမုဒ္ဒရာအတွင်း ပင်လယ်ပြင်၌ သဘာဝအရိုင်းနှင့် အသက်လုတိုက်ပွဲများ ထိုထိုသော ဘဝဖြတ်သန်းမှုများဖြင့် သူသည် ပင်လယ်ဝံပုလွေအား ရေးခဲ့၏။

ပင်လယ်ဝံပုလွေအား ၁၉ဝ၄ ခုနှစ်တွင် စတင်ထုတ်ဝေ၏။ နောက်ပိုင်း ဒုတိယအကြိမ်၊ တတိယအကြိမ်၊ အကြိမ်ကြိမ် ထုတ်ဝေခဲ့ရ၏။ ပင်လယ်ဝံပုလွေနှင့် ဂျက်လန်ဒန်သည် အမေရိကန်ဒေါ်လာ သိန်းချီ၍ ရခဲ့၏။

(၄)

ဂျက်လန်ဒန်၏ ပင်လယ်ဝံပုလွေအား ၁၉၅ဝ ပြည့်လွန်နှစ်များက ဆရာမိုးဝေမှ ဘာသာပြန်ခဲ့ဖူး၏။ Sea Wolf တွင် အခန်း ၃၉ ခန်း ရှိသည့်အနက် အခန်း ၂၂ ခန်းအား ဆရာမိုးဝေမှ ဘာသာပြန်ခဲ့ပြီး ပထမအတွဲအဖြစ် ထုတ်ဝေခဲ့၏။ ကျန်သည့် ၁၉ ခန်းအား ဒုတိယအတွဲအနေဖြင့် ထုတ်ရန် စီစဉ်ထားသော်လည်း အကြောင်းအမျိုးမျိုးကြောင့် ယနေ့ထိ ထွက်မလာခဲ့။

ဆရာညွန့်ကြူးက မိုးဝေမဂ္ဂင်းဇင်းတွင်ပင် ဂျက်လန်ဒန်၏ Sea Wolf အား အခန်းဆက်ဘာသာပြန် ဝတ္ထုရှည်အဖြစ် ဖော်ပြခဲ့သည်။ ၁၉၇၅ ခုနှစ်တွင်မူ ပင်လယ်ဝံပုလွေအား လုံးချင်းဘာသာပြန် ဝတ္ထုအဖြစ် ပထမအကြိမ် ထုတ်ဝေခဲ့၏။ ဆရာညွန့်ကြူး ဘာသာပြန်ခဲ့သည့် ပင်လယ်ဝံပုလွေသည်ပင် ၁၉၉၂ ခုနှစ်တွင် ဒုတိယအကြိမ်၊ ၂ဝဝဝ ပြည့်နှစ်တွင် တတိယအကြိမ်နှင့် ၃ ကြိမ် ထုတ်ဝေခဲ့ရသည်။

(၅)

ပင်လယ်ဝံပုလွေတွင် အဓိကဇာတ်ကောင် ၃ ဦး ရှိ၏။ `တစ္ဆေ’ သင်္ဘောကပ္ပတိန် `ဝံပုလွေလာဆင်’၊ စာပေအနုပညာရှင် `ဟမ်းဖရီဗင်ဝေဒင်’ နှင့် စာရေးဆရာမ `မစ္စမော့ဒ်ဗရူးစတား’ တို့ ဖြစ်သည်။

ဝံပုလွေလာဆင်၏ တစ္ဆေသင်္ဘောသည် ဖျံဖမ်းရန်အတွက် ဆန်ဖရန်စ္စကို ကမ်းခြေမှ၊ ဂျပန်ကမ်းလွန် ပင်လယ်ပြင်သို့ ရွက်လွှင့်လာခဲ့၏။ အကြောင်းအမျိုးမျိုးကြောင့် သင်္ဘောပျက်ခဲ့ကြပြီး ပင်လယ်အတွင်း မျောနေကြရာမှ `ဟမ်းဖရီးဗင်ဝေဒင်’ နှင့် `မစ္စမော့ဒ်ဗရူးစတား’ တို့ `တစ္ဆေ’ သဘောင်္ပေါ်သို့ အသီးသီး ရောက်လာခဲ့ကြ၏။ အတူတူ တချိန်တည်း ရောက်ခဲ့ခြင်းမျိုး မဟုတ်။ တကွဲတပြားစီ၊ တနေရာစီခွဲပြီး တစ္ဆေပေါ်သို့ ရောက်ခဲ့ကြခြင်း ဖြစ်၏။ သူတို့ ၂ ဦးက အမေရိကန် စာပေလောကမှ စာပေအနုပညာရှင်များ ဖြစ်ကြ၍ တဦး၏ အမည်ကို၊ တဦးက သိထား၊ ကြားဖူးထားကြ၏။ တစ္ဆေသဘောင်္ပေါ်ရောက်မှပင် သူတို့ လူချင်းဆုံမိကြ၏။

ဇာတ်ကောင် ၃ ဦးတွင် ဝံပုလွေလာဆင်က အဓိက ပိုကျသည်။ သူသည်ပင် ပင်လယ်ဝံပုလွေဟု ဆိုရမည်။ တောင်တရုတ်ပင်လယ်ပြင်အတွင်း သဘာဝအရိုင်းအစိုင်းနှင့် လူသားတို့၏ အားပြိုင်မှု တိုက်ပွဲများ၊ ဖျံဖမ်းသင်္ဘောအချင်းချင်း စီးချင်းထိုးမှုများ၊ တစ္ဆေသင်္ဘောပေါ်တွင် ဝံပုလွေလာဆင်နှင့် သင်္ဘောသားတို့၏ သတ်ပွဲ၊ သဘောင်္သားအချင်းချင်းကြား ရန်ပွဲများနှင့် ဂျက်လန်ဒန်သည် ပင်လယ်ဝံပုလွေအား အကြမ်းထယ် စုတ်ချက် ခြယ်ထား၏။ အမှန်တွင်မူ ပင်လယ်ဝံပုလွေက လူတို့၏ ဒဿနဆိုင်ရာ တွေးခေါ်မျှော်မြင်မှုအား စစ်ကြောထားခြင်း ဖြစ်၏။ ဦးနှောက်အား ဆွထားသော ဝတ္ထုတပုဒ်ဟု ပင်ဆိုရမည်။

(၆)

တစ္ဆေသင်္ဘောပေါ်ရှိ တည်မြဲသော သစ္စာတရားက အားသည်သာ အမှန်တရားဖြစ်၏။ ဥပဒေက တောရိုင်းကြီး ဥပဒေသည်သာ အမှန်တရားဟူသည့် သစ္စာတရားထွန်းကားရာ တောရိုင်းကြီး ဥပဒေသတို့ စိုးမိုးသက်ဝင်ရာ တစ္ဆေသင်္ဘော၌ `လာဆင်’ သည် အင်အားအကြီးဆုံး အာဏာရှင်၊ အရှင်သခင်၊ သူကား ကြမ်းတမ်း၏ ရက်စက်၏ ဤသို့ကြမ်းတမ်းရက်စက်နိုင်ရန်လည်း တောရိုင်းတိရစ္ဆာန် တစ်ကောင်အလား ခွန်အားက ရှိ၏၊ ဖြတ်လတ်သန်စွမ်းမှုက ရှိ၏။

ဤသို့သော `လာဆင်’ သည် `တစ္ဆေ’ သင်္ဘောနှင့် ပင်လယ်ဖျံများ ဖမ်းရန် ရွက်လွှင့်သွားသည့် ခရီးကြမ်း၌ သူ့အိပ်ခန်းအတွင်း စာအုပ်များအား စင်နှင့်အပြည့် ယူ၍သွားသည်။ ရှိတ်စပီးယား၊ တန်နီဆင်၊ အက်ဂါအယ်လင်ပိုး၊ ဒါဝင်၊ တိုင်းဒေါ၊ ဘားနဒ်ရှော၊ ရောဘတ်ဗရောင်းနင်း စသည့် ဂန္တဝင်စာပေ၊ သိပ္ပံပညာစာပေ၊ ကဗျာတို့ကား သူ၏ စာအုပ်စင်၌ ရှိ၏။ ထိုထိုသော စာများကိုလည်း သူသည် ကြေကြေညက်ညက် ဖတ်ထား၏။ သူကားစာပေမှ ဒဿနနှင့် လက်တွေ့ဘဝမှ အသိတို့အား ပေါင်းရုံး၍ ကိုယ်ပိုင်ဘဝအဓိပ္ပာယ် ရှာနေသူ၊ ကျင့်ကြံနေသူ။

“ငါယုံတာက ဘဝဆိုတာ စီကာစဉ်ကာ ရှိတာမျိုးမဟုတ်ဘဲ အမယ်ဘုတ်ချည်ခင်လို ရှုပ်နေတာပဲ။ အဓိပ္ပာယ်လည်း မရှိဘူး၊ ဒါပေမဲ့ ဘဝဆိုတာ ရွေ့လျားခြင်းတမျိုးပဲ။ တမိနစ်၊ တနာရီ၊ တနှစ်၊ ဒါမှမဟုတ် အနှစ်တရာ၊ တထောင်ကျအောင် ရွေ့လျားကောင်း ရွေ့လျားမယ်။ သတ္တဝါကြီးတွေဟာ သူတို့ရွေ့လျားနိုင်အောင် သတ္တဝါငယ်လေးတွေကို စားသောက်နိုင်မယ်။ အားကြီးတဲ့ သတ္တဝါဟာ သူတို့ခွန်အား တောင့်တင်းဖို့အတွက် အားငယ်တဲ့ သတ္တဝါတွေကို စားတယ်။ ကံကောင်းတဲ့သူက အများဆုံးစားရပြီး အဝေးဆုံး၊ အကြာဆုံး ရွေ့လျားနိုင်တယ်။ ဘဝဆိုတာ ဒါပဲ” ဝံပုလွေလာဆင် (ပင်လယ်ဝံပုလွေ၊ စာမျက်နှာ, ၅ဝ မှ)

“ခန္ဓာကိုယ်ဟာ အသုံးချဖို့ ဖြစ်လာတာပဲ။ ဟောဒီ ကြွက်သားတွေဟာ မိမိရရ ဆုပ်ကိုင်ဖို့၊ ဆွဲဖြဲဖို့၊ ငါနဲ့ ငါ့ဘဝအကြားမှာ ကန့်လန့်ခံနေတဲ့ အသက်ရှင်နေသူတွေကို ချေမှုန်းဖို့၊ ဒါပဲ၊ ဒါပဲ။ ဒီ့ပြင် အသက်ရှင်နေတဲ့ သူတွေမှာလည်း ခန္ဓာကိုယ်တွေ၊ ကြွက်သားစိုင်တွေ၊ မရှိဘူးလားလို့ မေးစရာရှိတယ်။ သူတို့မှာလည်း ရှိတာပဲ။ သူတို့ရဲ့ ကြွက်သားစိုင်တွေဟာလည်း အမိအရ ဆုပ်ကိုင်ဖို့ ဆွဲဖြဲဖို့၊ ချေမှုန်းဖို့ပဲ။ ဒါပေမဲ့ အဲဒီလူတွေဟာ ငါနဲ့ ငါ့ဘဝအကြားမှာ ကန့်လန့်ခံနေရင် ငါဟာ သူတို့ဆုပ်ကိုင်တာထက် ဆွဲဖြဲတာထက်၊ ချေမှုန်းတာထက် ပိုပြီးဆုပ်ကိုင်၊ ဆွဲဖြဲချေမှုန်းနိုင်တယ်။ ဒါကြောင့် ခန္ဓာကိုယ် သန်စွမ်းကြံ့ခိုင်တာဟာ အကြောင်းရှိမှုကြောင့် ဆိုတာထက် အသုံးဝင်မှုကြောင့်လို့ ဆိုချင်တယ်” ဝံပုလွေလာဆင် (ပင်လယ်ဝံပုလွေ၊ စာမျက်နှာ, ၁၂၇ မှ)

“ကျုပ် တခါတခါ သံသယဖြစ်မိတယ်။ ဆင်ခြင်တုံတရားဟာ ဘယ်လောက်အဖိုးတန်သလဲဆိုတဲ့ အချက်ကိုပါ။ အိပ်မက်မက်နေတာဟာ တန်ဖိုးများ ပိုရှိနေမလားဘဲ။ ဆင်ခြင်တုံတရားက ပေါက်ဖွားလာတဲ့ နှစ်သက်မှုထက် စိတ်လှုပ်ရှားမှုက ရတဲ့နှစ်သက်မှုဟာ ပိုရှည်ကြာတယ်။ ဒါကြောင့် ကျုပ် ခင်ဗျားတို့ကိုကြည့်ပြီး မနာလိုဝန်တို ဖြစ်မိပါရဲ့။ အရက်မူးနေတဲ့ သူတယောက်က တခြား အရက်မူးနေသူ တယောက်ကို ကြည့်ပြီး ငါလည်း သူ့လို မူးချင်လိုက်တာဆိုတဲ့ မနာလိုမှုမျိုး ဖြစ်နေမလားပဲ” ဝံပုလွေလာဆင် (ပင်လယ်ဝံပုလွေ၊ စာမျက်နှာ, ၁၈၆ မှ)

(၇)

ဂျက်လန်ဒန်သည် ပင်လယ်ဝံပုလွေ၏ ဇာတ်ကောင် ဝံပုလွေလာဆင်အား အဆုံးတွင် သေဆုံးစေခဲ့၏။ ဝံပုလွေလာဆင်သည် အရှုံးများအား အံတုရင်း၊ တွန်းလှန်တိုက်ခိုက်ရင်း တဆင့်ပြီးတဆင့် ဆုံးရှုံးခဲ့ရသည်။

ဂျပန်ကမ်းလွန်တွင် ပင်လယ်ဖျံများအား ဖမ်းရင်း သူ့အကို `သေမင်းလာဆင်’ ၏ `မာစီဒိုးနီးယား’ သင်္ဘောနှင့် ပင်လယ်အတွင်း စီးချင်းထိုးကြ၏။ သူရှုံးခဲ့ရပြီး သူ့သင်္ဘောသားများအားလုံး `သေမင်းလာဆင်’ ထံသို့ ပါသွားကြ၏။ သူကား ရွက်တိုင်ကြိုးများ ဖျက်ဆီးခံထားရသည့် `တစ္ဆေ’ သင်္ဘောနှင့် ပင်လယ်အတွင်း တဦးတည်း မျောချင်ရာသို့ မျောနေခဲ့၏။

ရွက်ထိန်း၍မရ၊ ပဲ့ကိုင်၍မရ၊ လှိုင်းနှင့်လေ၏ သယ်ရာသို့ တစ္ဆေသင်္ဘော ကပ္ပတိန်လာဆင်သည် ဦးတည်ရာမဲ့ လေလွင့်နေရသည်။ အခြေအနေက သဘာဝတရားအား အံမတုနိုင်တော့။

တပြိုင်တည်းတွင် ဦးနှောက်ကင်ဆာရောဂါက ဝံပုလွေလာဆင်ကို အတွင်းမှ တိုက်ခိုက်လာပြန်၏။ အမြင်အာရုံကြောက ပြတ်တောက်၍သွားပြီ။ ဝံပုလွေလာဆင် မျက်စိမမြင်တော့။ ကင်ဆာက ဝံပုလွေလာဆင်အား တဆင့်ပြီးတဆင့် တိုး၍တိုက်ခိုက်၏။ ခန္ဓာကိုယ်တခြမ်း သေသွား၏။ စကားပြော၍ မရတော့။ ကင်ဆာက ဝံပုလွေလာဆင်၏ ခန္ဓာကိုယ်အစိတ်အပိုင်းများအား တခုပြီးတခု ဦးနှောက်အာရုံကြောနှင့် ဖြတ်တောက်ပစ်၍ နေသည်။ နောက်ဆုံးခန္ဓာ၌ အသက်ဝိဉာဉ်လေးသာ ကျန်တော့၏။ အင်အားသည်သာ အမှန်တရား၊ မိမိရှင်သန်ရေးအတွက် ဟန့်တားနှောင့်ယှက်မှု မှန်သမျှအား အင်အားသုံး၍ ချေမှုန်းတိုက်ခိုက်ရမည် ဟူသည့် ဝံပုလွေလာဆင်အား ဂျက်သည် ဤသို့ နိဂုံးချုပ်ပေးလိုက်၏။

အနားသတ်က `လှ’ ၏။ ပြီးလျှင် စဉ်းစားတွေးခေါ်စရာများနှင့် `ယဉ်’ ၏။ စာအုပ်အား ဂျက်ရေးခဲ့သည့် နှစ်ကာလက ၁၉ဝ၃၊ ၁၉ဝ၄ ခုနှစ်၊ ထိုခေတ် လူ့အဖွဲ့အစည်း၏ တွေးခေါ်မျှော်မြင်မှုများအား ပင်လယ်ဝံပုလွေတွင် တူးဆွကြည့်ခွင့်ရ၏။

(၈)

၁၉၁၆ ခုနှစ် နိုဝင်ဘာလ ၂၂ ရက်နေ့တွင် ဂျက်လန်ဒန် ကွယ်လွန်ခဲ့၏။ ကွယ်လွန်ခဲ့သည် ဆိုသော်လည်း သူ့ကိုယ်သူ သတ်သေခဲ့ခြင်း ဖြစ်၏။ မော်ဖင်းနှင့် အစထရိုဖင်း ဆေးများအား သောက်၍ သူ့ဘဝ သူ့ဇာတ်အား သူ့ဘာသာသူ သိမ်းပစ်ခဲ့ခြင်း။

ဆန်ဖရန်စစ္စကိုမြို့ရှိ ဝတ်ကျောင်းတခုအတွင်း ဂျက်လန်ဒန်၏ ရုပ်အလောင်းအား သရဏဂုံတင်၏။ တိတ်တိတ်ဆိတ်ဆိတ်၊ ငြိမ်ငြိမ်သက်သက်၊ ခြောက်ခြောက်ကပ်ကပ်။ သရဏဂုံတင်ပေးသည့် ဘုန်းတော်ကြီးတပါး၊ မိခင်၊ ဇနီးနှင့် သမီးငယ် ၂ ဦး။ ပြီးလျှင် ပထွေးဘက်မှပါသည့် အမကြီး၊ ဤမျှသာ။ ဂျက်လန်ဒန်ကား သူ့ဈာပနနှင့်ပတ်သက်၍ သူ့အမကြီးအား မှာခဲ့၏။ `သူသေသည့်အခါ သူ့အလောင်းကို ပြာချပြီး သူ့ခြံထဲမှာပင် မြှုပ်နှံပေးပါ´

ဂျက်လန်ဒန်က ကွယ်လွန်ခဲ့လေပြီ။ သူကွယ်လွန်ခဲ့သည်မှာ ၉၃ နှစ်ကျော်ခဲ့ပြီ။ သို့သော် သူရေးခဲ့သည့် စာများက ယနေ့တိုင် ကျနော်တို့ စွဲစွဲမြဲမြဲ ဖတ်နေကြရဆဲ။ တခုတ်တရ သိမ်းထားကြရမြဲ။ နှင်းကမ္ဘာ၏ သမီးပျို၊ အရှင်လတ်လတ် ငရဲကျနေကြရသူများ၊ အရိုင်း၏ ခေါ်သံ၊ ပင်လယ်ဝံပုလွေ၊ သံဖနောင့်၊ ဂျွန်ဘာလီကွန်း (သို့မဟုတ်) အရက်သမားတဦး၏ မှတ်တမ်း စသည့် စသည့် စာအုပ်များ ရေးခဲ့သည့် အမေရိကန်ပြည်မှ ကလောင်နီဟု ဝိဂြိုဟ်ပြုရမည့် သတင်းစာဆရာ၊ စာရေးဆရာကြီး ဂျက်လန်ဒန်။ သူသည်ပင် သူ၏ ပင်လယ်ဝံပုလွေမှ ဝံပုလွေ လာဆင် ဖြစ်၍နေလေ၏။


မင်းဆွေသစ် | တနင်္လာနေ့၊ ဇွန်လ ၂၈ ရက် ၂၀၁၀ ခုနှစ် ၁၄ နာရီ ၃၁ မိနစ်